Thlawtheihna them MH370-a mi ni lo

Malaysia sorkar chuan Thailand chhim lam tuipui kama thlawhtheihna them nia hriat chhar chu kum 2014, March 8-a a chin hriat loha bo, Malaysia Airlines, flight MH370 thlawhtheihna them a ni lo tih Thawhlehni khan a puang.

Malaysia transport ministry chuan sorkar leh Malaysia Airlines mithiam rual te'n Thailand-a thlawhtheihna them chhar chu an enfiah thu tarlangin, a assembly number, wire bundle leh bolt hmante chu Boeing 777-a mi a ni lo tih an hmuchhuak a ni, a ti.

Mitsubishi Heavy Industries chuan Thawhṭanni khan Thailand-a thlawhtheihna them a serial number aṭangin rocket emaw a nih a rin thu a lo tarlang tawh bawk.

Thailand chhim lam tuipui kama thlawhtheihna them hi kum 2014, March 8-a Kuala Lumpur aṭanga Beijing pana thlawk, a chin hriat loha bo zui ta a nih ngei beiseina a siam nasa hle. Malaysia Airlines, flight MH370-ah hian mi 239 an chuang a, an chin hriat zui a la ni lo.