Swine flu vangin Russia-ah mi 50 an thi

Regional health authority chhinchhiah danin thla hmasa aṭang khan Russia-ah swine flu (H1N1 virus) avangin mi 50 an thi tawh.

Rostov biala health department thuneitute chuan Thawhṭanni khan mi pahnih an thih leh thu sawiin, he bialah hian mi pariatin hri leng hi an thih phah tawh a ni, an ti.

Volgograd biala health official te chuan an bialah hian mi 11 vel≠in hri leng hi an thihpui tawh tih an tarlang.

North Caucasus bial≠a, Dagestan khuaah puitling pali leh naupang pakhatin an thihpui tawh bawk a, Yekaterinburg biala Urals khuaah mi pahnih an thih bakah chhim lam biala Adygea khuaah mi pakhatin a thihpui tawh bawk.

Kum 2014, March thla khan Ukraine bul, Crimea-ah H1N1 natna vei hmuhchhuah a lo ni tawh a, Bryank, Belgorod leh Vladimir bialah te pawh natna vei hmuh≠chhuah a lo ni tawh bawk.

Russia Health Minister, Veronika Skvortsova chuan natna hri leng chu an khuahkhirh tawh thu Thawhṭanni khan a sawi.

Kum kum tir aṭang khan Soviet republic hun laia a huam chhunga awm, Armenia-ah mi 18-in hri leng hi an lo thihpui tawh a ni.

Russia ṭhenawm, Georgia ramah pawh swine flu hi mi pathumin an thihpui tawh a ni.

kum 2009-a Mexico leh United States aṭanga natna vei hmuhchhuah a nih hnuah World Health Organization (WHO) chuan he natna chung≠changah thuchhuah siamin, ram tinte chu fimkhur turin a ngen a, kum 2010 August thla khan natna hri leng chu a ziaawm tawh thu a puang a ni.

Kum 2009-a natna hri a len aṭangin ram 214-ah mi 18,500-in an thihpui tawh a ni.