Canada Parliament Speaker a bang

Canada Parliament speaker, Anthony Rota chu Parliament-ah Ukraine sipai veteran, indopui II-na hunlaia Nazi atana beitu, Yaroslav Hunka a chawimawi hnu lawkah Speaker a nihna aṭangin a bang.

Kar liam taa Ukraine president Volodymyr Zelenskyy-a'n Canada parliament a tlawh ṭum khan, Rota hian a awmna district-a Ukraine aṭanga pem lut sipai veteran pakhat chu Ukrainian hero tiin a sawi a, House member-te pawhin standing ovation an pe hial. Parliament-a chawimawi a nih hnu lawkah Hunka chu, SS 14th Waffen Grenadier Division-a Nazi sipai a ni, tiin Friends of Simon Wiesenthal Center chuan a tarlang a ni. Nazi sipai a ni tih hriat a nih leh tak avangin Rota chu bang tura phutna thawm a ring hle a ni.

Rota chuan,"Rilru hrehawm tak chungin House of Commons speaker aṭang hian ka bang tih sawi turin ka rawn ding chhuak a ni," tiin floor-ah a sawi a, a thil tih avanga a inchhir thu leh Canada leh khawvel puma Juda community-te rilru a tihnat avanga pawi a tih thu a sawi bawk.

Canada Parliament-a thil thleng hi Juda-te tana thawktu pawlte chuan na takin an dem thu an sawi a, "He thil thleng hian Member of Parliament 338-te chu a tibawrhbang a ni. Hei hi Russia tana chakna niin, Canada leh Ukraine thawhho ṭhatzia lantir pawh a tidal a ni," an ti.

Rota hi kum 2019 khan Parliament speaker atan ruat a ni.