Myanmar sipai sorkarin eiruk kaihhnawihah general 2 a ban

Myanmar sipai sorkar chuan Thawhṭanni khan a council leh cabinet a siksawi a, tun hnaia eiruk kaihhnawiha chhui mek sipai general pahnih chu a ban tih state media chuan an tarlang.

Sipai sorkar, State Administration Council hian kum hnih leh a chanve liam taa Aung San Suu Kyi kaihhruai sorkar thuneihna a hnehchhuh hnuah, ṭum li a insiksawi tawh. Sipai sorkar a din hnuah Myanmar ramah buaina a la chhuak zawm reng a ni.

Council member pahnih, Army Chief of Staff Lt.-Gen. Moe Myint Tun leh Lt.-Gen. Soe Htut chu eiruk kaihhnawhah chhui mek an nih thu puanzar a nih hnuah lawkah sorkar hi a insiksawi nghal a ni. Sorkar enkawl chanchinbu Global New Light of Myanmar chuan Thawhlehni khan council member tharte chu puangin, council member list tharah hian Myoe Myint Tun leh Soe Htut an tel ve lo a, telh an nih loh chhan erawh sawi lan a ni lo thung.

Sorkar enkawl ni lo news agency Myanmar Now leh The Irrawaddy chuan economic supervisory body lian pathum ṭhutchilhtu, Moe Myint Tun chu tun thla tira sumdawng mi ṭhahnem tak, thamna pek kaihhnawiha man an nih aṭang khan chhui ve nghal a nih thu a tarlang.

Myanmar Now chuan Moe Myint Tun leh a hnuaia thawkte chuan fuel leh cooking oil industry-a sumdawnnaah dollar maktaduai tam tak an eiru tih a sawi a, Soe Htut pawh home affiars minister a nih laia dik lo taka hlawkna a chan avangin "medical leave" pek a nih thu a tarlang bawk.

Myanmar sipai sorkarah hian a thu chuan Cabinet hi ram rorelna sang ber a nih laiin, a nihna takah chuan sipai tamna council hi an lal zawk a ni. State of emergency puan a nih hnuah phei chuan cabinet thuneihna hi tihnep lehzual niin, legislative, judicial leh executive power chu sipai hotu Min Aung Hlaing hnenah hlan vek a ni.