Iraq-a kangmei chhuakah mi 100 chuang an thi

Iraq chhim lama awm Nineveh province-a mo lawmnaah kangmei nasa tak a chhuak a, nunna chan hi mi 113 tling tawhin, mi 150 chuangin hliam an tuar.

Nineveh deputy governor Hassan al-Allaq chuan kangmei hi Thawhlehni zan dar 10:45 bawr vela chhuak ṭan a nih thu a sawi.

Nineveh provincial governor Najim al-Jubouri chuan kangmei tuar zat report kimchang a la awm theih loh avangin mitthi zat hi la pung thei a ni tih a sawi a, Iraq health ministry thupuangtu Saif al-Badr pawhin kangmei tuarte tana chhanchhuah leh chhawmdawl hna ngawrh taka thawh nghal a nih thu a sawi ve bawk.

Iraq official news agency INA tarlan danin, kangmei chhuahna hmun hi Hamdaniyah district-a mo lawmna hall-ah a ni. Hamdaniyah district hi Mosul khaw chhim lam, Baghdad aṭanga km 400 vela hlaa awm a ni.

Iraq civil defence chuan mo lawmna atana puak thei thil hal aṭanga hall hi kang ni ngeia hriat a nih thu a sawi. Kangmei chhuah lai hian hall chhungah mi 1,000 vel zet an awm niin a tarlang.

Iraq prime minister Mohammed Shia al-Sudani chuan kangmei chhuak chu chhui chiang nghal tur leh, an ram interior and health ministry chu kangmei tuarte tan chhawmdawlna siam turin thuchhuah a siam nghal a ni.