UN Human Rights hotuin Myanmar buaina titawp thuai turin ngen

United Nations high commissioner for human rights, Volker Turk chuan Myanmar rama buaina leh chhiatna nasa tak thleng mek chu titawp thuai turin a ngen.

UN Human Rights Council-a thu a sawinaah, Turk chuan Myanmar-a dan dik loa sipai sorkar ding chuan nitin an ram mipuite dikna chanvo an palzutsak a ni tiin, an chet dan chu mihring chet dana rawng leh bawlhhlawh ber a ni, a ti.

Myanmar ramin sawi chhuah zawh loh khawp manganna leh chhiatna a tawh mek tihtawp a nih theihna tura ngaihtuahna thar neih a ṭul thu Turk chuan a sawi a, a hmaa a lo ngen tawh angin UNSC chu International Criminal Court-ah Myanmar chungchang thleng turin a ngen leh bawk.

High Commissioner chuan Myanmar rama buaina thleng tam tak, policymaker leh journalist-te'n an ngaihven lohte pawh a rawn sawi chhuak. "Nitinin Myanmar mipuite chuan rawng taka beih an tuar a, an dikna chanvo palzutsak an ni a, an beiseinate tihchhiatsak an ni," a ti. Myanmar sipai sorkarin an ram mipuite a beihna ṭum 22 thleng pawh sawi langin, sipaite chuan ngaihtuah phak bakin mipuite an tina a, ṭhenkhat a nung chungin an hal a, an taksate chan darh niin, pawngsual, lu tansak bakah an mi mante chu midangte an beihna leh chilpuah bomb laka invenna atante an hmang bawk a ni, a ti.

Turk chuan April, 2022 leh July, 2023 inkarah sipaite hian ṭum 687 zet airstrike neiin, mi 4,108 an tihlum tih a sawi. Hei bakah in leh structure 75,000 chuang tihchhiat a ni a, sakhaw hmun pawimawh tam tak bomb chhiat an ni bawk tih a sawi.

Kum 2021, February 1-a sipaite'n civil sorkar thuneihna an hnehchhuh hnuah, sipai sorkar dodalna lantirtu zinga mi 24,836 man a ni a, an zinga 19,264 chu vawiin thlenga hren chhunzawm niin, sipai thunun court chuan mi 150 chu thi tura hremna a pe tawh bawk tih Turk chuan a tarlang. Myamnar ram pum chu tan in lian tak leh, mi tihhlumna tualzawlah a chang tawh a ni, a ti.

Myanmar civil mite veng leh chhanhim turin UN chu a chet thuai a ngai a, sipai sorkar chu a inthlak danglam mai dawn lo a, hei vang hian hun khawh ral hman a ni tawh lo, tiin Turk chuan a sawi.