Colombia-ah Zika virus vei 20,000 chuang awm

Latin America rama Zika virus leng chuan ziaawm lam a la pan thei lo a, South America-a Colombia ramah chuan mi 20,000 chuangin he hri hi an vei tawh a, an zingah hian naupai lai 2,116 an tel.

Colombia National Health Institute chuan Inrinni khan report tichhuakin, Zika hri vei finfiah tawh hi 20,297 an tling tawh tih a sawi a, Brazil dawtah Zika hri vei tamna ber an ni. Colombia rama hri vei hmuh chhuah zinga a tam zawk hi hmeichhia an ni a, finfiah tawh zingah hmeichhia hi 63.6% an tling.

World Health Organisation chuan America ramah Zika hi a darh chak hle tih a sawi a, kuminah mi maktaduai 3-4 velin an kai hman a rinawm tih a sawi. Colombia ram bikah hian kuminah mi 600,000 velin Zika hri hi an kai rin a nih thu sorkar thuchhuah chuan a tarlang.

Guatemala health official-te pawhin an ramah Zika hri vei hi mi 105 an awm tawh niin an sawi. Health Ministry epidemiologist Judith Garcia chuan mi 105 te hi an vei ngei tih finfiah tawh an ni tih sawiin, rinhlelh dang finfiah loh pawh an la awm niin a sawi.

US-a Texas state-ah pawh Zika hri vei finfiah mi prauk an awm tawh niin state Health Department chuan a tarlang. Heng mi parukte hian ram hrang hrang tlawha an zinkual hnuah an kai niin a sawi. Tualchhung aṭanga kai erawh chu an la awm lo niin a tarlang nghal bawk. Jamaica-ah pawh mi pakhat, Texas aṭanga zin haw chu Zika virus a vei tih finfiah a nih thu an ram health ministry chuan a tarlang bawk.

Brazil ramah chuan Zika vei hi mi maktaduai 1.5 vel an awm tawh a, nikuma an rama he hri a darh aṭang khan pianphung pangngaia lu leh thluak te nau piang 3,718 an awm tawh a ni.

Kumin August thlaah Brazil ram hian Olympic Games a thlen dawn avangin Zika hri hi a darh phah nasat hle rin a ni a, mahse Rio de Janeiro mayor Eduardo Paes chuan a hlauhthawnawm dawn lo niin a sawi thung. Paes chuan Olympic Games neih hun, August thla hi Brazil ramah chuan thlasik lai a nih dawn avangin Zika hri hi a darh a hlauhawm lo niin a sawi.

Mahse researcher-te chuan Olympic Games chhung hian ramdang aṭangin Brazil tlawhtu mi nuai nga vel an awm dawn a, hei vang hian Zika hri hi ram tam zawkah a darh zel a hlauhthawnawm dawn hle niin an sawi thung.