Myanmar MP kalchhuak turte thlah

Myanmar ram sorkar thar din tura inbuatsaihna chu kalpui mek a ni a, kar kalta Zirtawpni khan Parliament member kalchhuak turte chu thlah an ni. Vawiinah Parliament thar chu a hmasa ber atan an ṭhukhawm dawn a ni.

Member kalchhuak turte thlahnaah, National League for Democracy (NLD) hotu, Aung San Suu Kyi-i chuan thu sawiin, November thlaa inthlanpuia hnehna an chan hnua sorkar thar ding tura an tana kawng hawnsaktute chungah lawmthu a sawi.

Suu Kyi-i chuan, Parliament member tharte chu parliament chhung leh pawn lamah pawh an ram leh mipuite tana lungrual taka an thawhho theih zel a beisei thu a sawi.

Parliament term tawpna leh member-te thlahna hun buatsaihah hian party hrang hrang aṭangin member hlui leh thar turte an kal ṭha hle a, hun hlimawm tak hmangin zanriah pawh an kilho nghal.

Tunkar chhungin MP tharte hian Parliament Speaker an thlang dawn a, hemi hnu hian President thar tur thlan a ni leh ang. President tur hi Parliament in hnih leh sipai aiawhte'n pakhat ṭheuh an nominate thei dawn a, heta aṭang hian member-te hian an thlang chhuak dawn a ni. March thla tawp hian President thar kaihhruaina hnuaiah sorkar thar a ding tawh ang.

November thlaa inthlanpui neihah khan NLD hi hneh taka thlan tlin ni mah se, sipai rorel laia an ram danpui siam hnuaiah NLD hotu, Suu Kyi-i hi President atana dah theih a ni dawn lo a ni. Ram danpui chuan ramdang mi nupui pasala neia an laka fa neite chu President atana dah a khap a ni. Hei bakah hian Parliament tharah hian sipaite chuan ministry pawimawh pathum an la chang dawn a, parliament seat hmun li-a ṭhena hmun khat chu sipai hian an la chang chhunzawm dawn bawk.