AU summit vawi 26-na nei

African Union (AU) summit vawi 26-na, ni hnih awh chu Ethiopia khawpui, Addis Ababa-ah Inrinni leh Pathianni khan neih a ni.

AU summit hian Africa ram hruaitu hrang hrangte bakah ramdang palai an sawmte an tel a, an mi sawm zingah hian UN Secretary General Ban Ki-moon leh Palestinian President Mahmoud Abbas-te an tel.

Summit ṭanna in≠khawm≠ah hian AU Chair≠person kalchhuak, Zimbabwe President Robert Mugabe chuan thu a sawi a, Africa khawmualin kawng hrang hranga chona a hmachhawnte hneh tur chuan ṭanrual≠na leh inpumkhatna a pawimawh thu a sawi.

"Innghahna tlak ni turin lungrual taka kan thawhho a ngai a, firfiaka chetna te, hrileng leh ramchhung buaina lak
aṭang tea kan zalen theihna tura kan beihho a ngai a ni," a ti.

UN hotu Ban Ki-moon pawhin thu sawiin, Africa ram hruaitute chu intluktlanna leh mihring dikna chanvo humhalh tura theihtawp chhuah zel tur leh, remna leh muanna leh ram hmasawnna te kalpui zel turin a chah. Africa ram hrang hrangte thawhhona leh inpumkhatna chu firfiak, retheihna, hri leng leh pemchhuakte venna kawngah a pawimawh hle a ni tiin, Ban chuan, "Africa chu midangte tana entawn tur siam theitu tur a ni. Ebola hri leng dona kawngah an thawhhonate kha a fakawm hle a ni," a ti.