Russia-in defence tana sum sen 70% dawnin a pun dawn

Russia chuan defence tana a sum sen zat chu kum 2024-ah 70% dawnin a pun dawn tih finance ministry-in Ningani khan a sawi.

Nikuma Russia leh Ukraine indo hnu aṭang khan Russia chuan sum lamah harsatna tawk mah se, nasa taka ralthuam siam chhuah belhin, military machine-ah sum tam tham tak a hman belh reng a ni.

Finance ministry thuchhuah chuan defence atana sum senral hi 68% in a pung dawn niin a tarlang a, hei hi $ tld 111.15 niin, GDP aṭangin 6% a tling hial. Defence atana sum sen hi kum 2024-ah chuan education, environment protection leh healthcare atana sum hman belh khawm aia a let thuma tam zawk tura chhut a ni.

Finance ministry chuan, "Tunah chuan economic policy-in a tum chu anti-crisis agenda ni loin, ram hmasawnna tur chawikan a ni a, hetah hian ram sipai chak lehzual leh Ukraine rama Lugansk, Donetsk, Kherson and Zaporizhzhia ramte neih a ni" tiin a tarlang.

Russia-in defence atana sum a hman belh zel avangin, Russia central bank chuan kum 2023 chawhnu lam aṭang chuan economy-in a tuar dawn tiin a sawi a, thil man punna pawh bank target aiin 4%-in a sang dawn, a ti bawk.

President Vladimir Putin erawh chuan, Ukraine nena indo avangin sum leh paia harsatna an tawk lo tia sawiin, khawthlang lamin an hrekna chu Russia chuan a hneh thei zel tiin a sawi thung.