Bolsonaro-a'n inthlan chuh a dilna Court-in a hnawl

Brazil president hlui Jair Bolsonaro-a'n kum riat chhung inthlan chuh khapsak a nih chungchang ngaihtuah ṭha tura Brazil Superior Electoral Court-a dilna (appeal) a theh luh chu Ningani khan court chuan a hnawl.

Court hian June thla khan Bolsonaro chu Brazil inthlan buatsaih chungchangah thil dik lo awm anga a sawi chungchangah thuneihna leh media-te hmang suala puhin, kum 2026-a presidential election neih turah a chuh ve a khapsak a ni.

June thlaa ruling a siamah, Court chuan Bolsonaro chu kum 2022 presidential election hma thla thum a la awmah, information dik lo hmangin electronic ballot box chu rintlak lo anga chhuahah a puh. Hemi ṭumah hian Bolsonaro chuan leftist candidate Luiz Inacio Lula da Silva a hneh lo a ni.

Court rorel ennawn leh tura Bolsonaro-a'n a ngenna chu magistrate pasarih ṭhutna court chuan inlungrual takin a hnawl.

Far-right hotu hlui chuan Court thuthlukna chu 'hnungzanga chhun ang a ni' tia sawiin, Brazil-a court sang ber Supreme Federal Court-ah a appeal leh dawn tih a sawi.Nikum July thla khan Bolsonaro chuan, electronic ballot system-a thil dik lo awm chu Armed Force-te nena ṭangrualin siam ṭhat a lo tum tawh a, Lula nena a inkhin lai pawhin electoral sysytem chu khawihchingpen theih a ni tih vawi tam tak a sawi bawk.

Nikum October thla inthlana a chak loh avanga lungawilo Bolsonaro zuitu sang chuangte chuan kawngpuite an dan bakah, sipai inrawlh tura phutin ram chhunga sipai awmna hmunahte an camp a ni.Kumin January 8-a president atana Lula lak luh a nih hnuah pawh Brasilia khawpuia president, congress leh Supreme Court building-te an tichhe bawk.