Sweden-ah gang violence a hluar PM-in army leh police hotute a ko

Sweden prime minister Ulf Kristerrson chuan an rama gang violence hluar chungchang ngaihtuahho turin armed force hotu leh police commissioner a ko tih Ningani khan a sawi. Sweden-ah hian September thla chhungin gang violence avangin mi 11 laiin nunna an chan tawh a ni.

Nilaini khan Stockholm-a inkahna hmun hniha thlengah mi pahnih thah an ni a, Ningani zing kar khan Uppsala-ah in bomb ni bawkin, hetah hian hmeichhe pakhat kum 20 bawr vel a boral bawk.

Prime Minister Kristerrson chuan TV-a thu a sawiah, "Misualte chu kan zawng ang a, kan hneh ngei ang," a ti.

Kristersson-a hian nikum inthlan zawhah khan Sweden Democrats-te puihnain centre right minority sorkar a din a, hemi hma hian Social Democrat sorkar chuan kum riat lai sorkarna fawng an chelh a ni. Kristersson kaihhruai ṭangrual pawl sorkar hian Sweden-a gang violence hluar tihziaawm an tumna chu inthlanah chakpuiin, hemi hlawhtlinna atan hian police-te hnenah thuneihna sang zawk pek an nih bakah, silai kaihhnawih pawikhawihnaah hremna na zawk siam a ni bawk.