Myanmar Parliament-in Speaker thlang thar

Myanmar Parliament thara session hmasa ber chu nimin khan an ram khawpui, Nay Pyi Taw-ah neih a ni. Speaker thar an thlang.

Nimina Parliament lower house, House of Representative session hmasa berah hian National League for Democracy (NLD) member U Win Myint chu Speaker atan thlan a ni a, Deputy Speaker atan Union Solidarity and Development Party (USDP) member U Ti Khun Myat thlan a ni bawk. Session hmasa berah hian MP 430 an tel a ni.

Upper House, House of Nationalities session hmasa ber chu Nilaini hian neih a ni dawn a, karlehah Region or State Parliament session ṭan a ni bawk ang.

House Speaker atana thlan tlin a nih hnuah thu sawiin, U Win Myint chuan an ram tana ni chhinchhiah tlak a ni tih sawiin, democracy sorkar din tura an inbuatsaihna chu tluang taka a kal zel thu a sawi. Pawl hrang hrangte chu democracy system tungding a, mipuite dikna chanvo chawinung a, mipui rorelna sorkar ṭha a din theihna tura theihtawp chhuah
ṭheuh turin a ngen.

Parliament thar session hmasa ber hi NLD hruaitu, Daw Khin Htay Kyew chuan a kaihruai a ni.

Nikum November 8-a inthlanpui neihah khan Aung San Suu Kyi-i kaihhruai, NLD party chu hneh tak thlan tlin a ni. Parliament level pathuma seat 1,150 awmah NLD hian seat 886 a nei pha a, hei hi 77% a tling a ni. House of Representatives bikah seat 255 neiin, 79% a nei pha a, House of Nationalities-ah member 135 neiin 80% a nei bawk. Region or State Parliament-ah NLD han member 496 a nei a, hei hi 75.7% a tling; tin, hnam bil aiawh 17 a nei tel bawk.

NLD hian sorkar thar siam dawn mah se, an ram danpui angin parliament-ah sipai tan seat 25% dah a la nih avangin thuneihna pawh hi an la insem a ngai dawn a ni. Sipai hian ministry pawimawh pathum, security lam kaihhnawihte chu a la chang chhunzawm dawn a ni.