Madives President-ah China thlawptu Mohamed Muizzu thlang

China ṭantu Mohamed Muizzu chuan Inrinnia Maldives President thlanna neihah hnehna a chang a, hei hian Madives leh India inkar inlaichinnaah nghawng a neih rih a ni.

President thar thlannaah hian kum 45 mi, Muizzu hian vote tla aṭanga 54.06% hmuin a chak a ni. A khingpui, Maldives President ni lai, Ibrahim Mohamed Solih chuan Inrinni zanah khan a chak loh a pawm thu leh, Muizzu a lawmpuina thu chu X-ah a post tawh bawk. "President-a thlan tlin Muizzu ka lawmpui e. Ram mipuite chungah pawh, inthlanna ralmuang leh felfai a awm theih avangin lawmthu ka sawi bawk," tiin a post a ni.

Muizzu hi November 17-ah president atan lak luh a ni dawn a, hemi hma hian kum 61 mi Solih chu caretaker president a ni rih ang.

Maldives President thar tur, Mohamed Muizzu hi Britain aṭanga civil engineer zir chhuak a ni a, a hmain a mentor Abdulla Yameen kaihhruai sorkarah construction minister dinhmun a lo chelh tawh a ni. Eirukna avanga Yameen-a man a nih hnuah an party hi a kaihruai zui a ni. Construction minister a nih lai hian China Belt and Road infrastructure hmalakna chhawr ṭangkaiin hmasawnna hna tam tak a lo thawk tawh a, nikuma Chinese Communist Party official-te nena meeting an neih ṭum pawhin an party-in sorkarna an chang a nih chuan ram pahnihte inzawmna a nghet leh zual dawn tih a lo sawi lawk tawh nghe nghe a ni.