Thihchilh bomb puah ṭum hnih thlen chhanah Pakistan-in India a puh

Pakistan sorkar chuan kar liam ta Zirtawpnia an rama thihchilh bomb tihpuah a nih chungchangah India intelligence agency-te chu inrawlhah a puh.

Mastung district-a Balochistan hmuna Prophet pian cham lawmnaa mipui pung khawm zingah thihchilh bomb hi tihpuah a ni. Darkar tam a liam hmain Khyber Pakhtunkhwa hmuna mosque-ah thihchilh bomb dang tihpuah a ni leh bawk a, hetah hian mi pangain nunna an chan a ni.

Balochistan khawpui Quetta-a thu a sawinaah, Pakistan Interior minister Sarfaraz Bugti chuan India's Research & Analysis Wing (RAW) chu pawikhawihna thlengah hian inhnamhnawihna neiah a puh a, "Civil, military leh institution dangte chu Mastung-a thihchilh bomb puak chungchanga mawhphurtute lakah na takin a huhoin a che dawn. RAW hian inhnamhnawihna an nei a ni," tiin a sawi.

Police-te chuan Inrinni khan investigation an kalpui nghal a, thihchilh bomb tipuaktu DNA pawh zir chiang turin an thawn tawh tih an sawi.

Balochistan khaw chhung, Mastung hmuna thihchilh bomb puakah hian mi 60 an thi tawh a, mi 60 dangin hliam an tuar bawk.Thihchilh bomb puah vawi hnihna Hangu khuaa Khyber Pakhtunkhwa hmunah hian police station mosque bitum niin, mi pangain nunna an chan bakah, mi 12 dangin hliam an tuar bawk.

Inrinni vek khan Counter-Terrorism Department (CTD) chuan report theh lutin, mi tu tih hriat loh lakah tual thah thubuai ziah luh tawh a nih thu a sawi. "Eng pawl mahin a mawh an la la lo a, amaherawhchu, firfiak pawl Tehreek-i-Taliban Pakistan (TTP)-te chuan an tih a nih loh thu an sawi tawh thung" tiin report chuan a tarlang bawk.