Armenia-ah mi nuai 1 chuang an raltlan

Azerbaijan sipaite'n Nagorno-Karabakh an hnehchhuh leh tak hnuah, mi nuai khat chuang chu sahimna zawngin Armenia-ah an raltlan tih United Nations chuan a sawi. Anni bakah hian raltlan sang chuang ramriah an la tang mek bawk.

U.N refugee agency UNHCR hotu Filippo Grandi chuan,"Raltlan tam takte chu an ril a ṭamin an chau hle a, rang taka ngaihven an ngai hlawm," tiin kar liam ta Zirtawpni khan social media-ah tarlangin, khawvel ram hrang hrangte aṭanga ṭanpuina an mamawh thu a sawi.

Armenia sorkar Europen Union-te chu raltlante chhawmdawlna lailawk lo pe tur leh, an damdawi mamawh angte pe turin a ngen a ni.

Nagorno-Karabakh aṭanga Armenia-a raltlante chungchang a tir aṭanga ngaihventu, freelance journalist Siranush Sargsyan chuan car leh truck-ah tawt taka an bungruate phurin Armenia panna tlang pang kawngpuiah mi sang chuang an tang mek tih a sawi.

Azerbaijan-te'n Nagorno-Karabakh an lak let leh tak avangin, Karabakh hmuna Armenian 1,20,000-te chuan tihduhdah leh nuai chimih hlauin helai hmun chhuah san runpui hi an nei mek a ni.

Nagorno-Karabakh hi Azerbaijan ram zinga chhiar tel ni mah se, kum 30 liam taa Soviet Union a kehchhiat hnuah khan Armenian Christian-te chuan khawsakna hmun atan an hmang a ni.