Syria raltlante lehkha zirtir nan dollar tld 1.4 mamawh

Khawvel chawimawina sang, Nobel Peace Prize dawng tawh, Pakistan education activist Malala Yousafzai-i chuan Syria refugee zinga naupangte hnena lehkha zirtirna atan dollar maktaduai 1.4 mamawh anih thu a sawi.

Malala Yousafzai-i chuan Ningani hian ram hrang hrang sorkar leh hruaitute hnenah raltlante zirna atana sum mamawhte hi pe tura a ngen tur thu a sawi. Ningani hian London-ah 'Supporting Syria and the region' conference neih a ni dawn a, he conference hian Syria tualchhung indona thleng avanga mipuite harsatna tawk mekte chhawmdawlna tur tuak a tum a ni.

Yousafzai-i chuan Syria raltlan zinga naupangte chu ṭum eng emaw zat a hmuh tawh thu leh, a theinghilh theih loh thu a sawi. "An damchhungin school an kal thei lo mai thei tih ka ngaihtuah ringawt pawhin hrehawm ka ti a, ka pawm thei lo a ni" a ti. "Raltlan naupangte chuan school kal an mamawh a, lehkhabu leh zirtirtu an mamawh a ni. Anni humhim tur hian kan la pui thei reng a ni" a ti.