Damascus-a bomb puakah mi 60 an thi

Syria khawpui, Damascus-a sakhaw hmun pawimawh bulah Pathian≠ni khan ṭum thum bomb a puak a, mi 60 chuang an thi a, mi dang 40 in hliam an tuar.

Bomb puahna hmun hi Shia Muslim ho hmun thianghlim, Sayyida Zeinab shrine bul a ni a, bomb pakhat chu car hmanga tihpuah a ni.

Syrian Observatory for Human Rights chuan thi zingah hian Shia fighter tam tak an tel tih a sawi a, hliam tuarte zinga eng emaw zat chu an dinhmun a ṭha lo hle a, thi zat pawh hi an punchhoh a rinawm thu a sawi bawk.

Islamic State of Iraq and Levant (ISIL) firfiak pawl chuan bomb tipuaktu hi an nih thu an sawi a, Shia mite hmun pawimawh an beih thu an sawi bawk.

Sayyida Zeinab shrine-ah hian Shia Muslim-ten Prophet Mohammad-a thlaktu dik tak nia an ngaih, Ali Ibn Abi Taleb-a fanu thlan a awm. Prophet Mohammad-a thlaktu chungchangah hian Sunni leh Shia-te hi an rindan a in ang lo a, an buai phah fo a ni.

Kum 2015, Feb≠ruary thla khan shrine bula checkpoint chu beih a lo ni tawh bawk a, mi pali an thi. Hemi thla vek hian he shrine tlawh tuma Lebanon aṭanga Shia Muslim kal phurtu bus chu beih a ni a, mi pakua an thi. Al-Nusra Front chuan bus beitu hi niin an inchhal a ni.