Russia President-in ram danpui thlak rawt PM Medvedev kaihhruai sorkarin banna thehlut

Russia President Vladimir Putin chuan an ram Danpui thlak danglam a, Parliament lower house State Duma kutah thuneihna sang zawk pek a rawt. State Duma kutah hian President kuta awm ṭhin, prime minister leh minister dangte ruatna tura thuneihna pek a rawt tel a ni. 

Vladimir Putin hian kum 2000 aṭang khan Russia ram hruaitu dinhmun, President leh Prime Minister dinhmun a chelh chhawk chho a ni. Rawtna a siamah hian President pawh term hnih chin nih theih leh, post pawimawh zingah residence qualification khauh zawk siamte a tel. State Council-a State of the Nation address a neihah, Putin chuan a rawtna siam chung­changah hian rampumah mipui ngaihdan lak a ni dawn tih a sawi. A rawtna siamte hi a tlang a nih chuan President thuneihna hi a nep sawt dawn a ni. Putin hian Russia President dinhmun hi kum 2024 thleng a la chelh dawn a, tun hi President term li a chelhna a ni. 

Putin thusawi zawh hian prime minister Dmitri Medvedev chuan a kaihhruai sorkar chuan banna an thehlut nghal tih a sawi. Hei hi President-in rawtna a siamte a taka tihpuitlin a nih theihna tura President hnena thutlukna siam theihna tur remchang pek an duh vang tih a sawi. Banna an thehluh hma hian Medvedev hian Putin pawh hmuin a sawipui a ni. Putin pawhin PM leh minister-te banna thehluh hi a pawmsak nghal a, hemi rual hi minister-te chu sorkar thar a din hma chuan caretaker anga lo awm chhunzawm rih turin a ngen. 

President Putin chuan prime minister thar atan Tax Sevice chief Mikhail Mishustin chu a ruat nghal a, hei hi Parliament-in a pawmpui a la ngai dawn a ni. Kum 53 mi, Mishushtin hi kum 1998 aṭang khan sorkarah chanvo pawimawh a chelh ṭan a, kum 2010 aṭang khan Federal Tax Service hotu dinhmun hi a chelh a ni.