WHO-in Zika virus vang-in emergency meeting nei
World Health Organisaton (WHO) chuan tunlaia South America rama Zika hri leng mek chungchang ngaihtuahin nimin khan Geneva-ah emergency meeting an nei.
WHO Director General Margaret Chan chuan America rama Zika virus leng mek chu a darh chak em avangin a hlauhthawnawm thu a lo sawi tawh a, kumin chhungin an bial chhungah hian mi maktaduai li velin he hri hi an vei hman a rinawm niin a sawi.
UN health agency chu Zika virus leng mek khuahkhirh a nih theihna tura rang taka hma la tura nawr mek a ni.
Nimina emergency meeting-ah hian Zika virus len mekna ram aiawhte bakah mi thiam bikte chu telephone conference neihpui an ni a, mahse meeting thutlukna siam hi vawiin lamah puan theih chauh beisei a ni.
Zika hri leng mek hi a damdawi bakah a venna tur a la awm lo a, WHO chuan vaccine siam tur pawh hian a rei lo berah kum khat tal a la ngai dawn niin a sawi.