UK-in AUKUS nuclear submarine siamna tur $ tld 4 contract ziak

United Kingdom chuan Australia leh United States-te nena AUKUS programme an neih hnuaiah, UK company 3-te chu indonaa hman chi nuclear chakna hmang, tui hnuai lawng (submarine) siam chhuahna tur USD tld 4.9 contract a ziahpui.

UK Ministry of Defence chuan Pathianni khan thuchhuah siamin, BAE Systems, Rolls-Royce leh Babcock-te chu contract a ziahpui tih a tarlang a, UK leh AUKUS programme tan mellung pawimawh tak a ni tih a sawi.

Thuchhuah chuan submarine thar siam tur, SSN-AUKUS tih chu Royal Navy-in attack submarine a siam chhuah zinga a lian ber, changkang ber leh chak ber a ni dawn tih sawiin, vessel pakhatah khawvela sensor, design leh ralthuam ṭha ber berte dah a ni dawn tih a tarlang bawk. Submarine hi UK chuan kum 2030 kum tawp lamah an hmang ṭan thei dawn a, Australia chuan kum 2040-ah an nei ve thei thung ang.

Kumin March thla khan Australia, UK leh US ram hruaitute chuan Asia Pacific region-a China el pha thei tura hma an laknaah SSN-AUKUS siam chhuah tum chungchang hi an lo sawiho tawh a ni. Nuclear submarine siam tur hi stealth leh range-ah submarine dangte aia chungnung zawk fe tura duan a ni a, tun ṭum hi US in a nuclear technology-te UK ram tih loh ram danga a pek awm chhun a ni bawk.

Australia defence minister Richard Marles chuan AUKUS programme chu "Indopui II zawh hnua kan ram military hmasawnna tura ke penna lian ber a ni," tiin a lo sawi tawh bawk.

Mithiamte chuan AUKUS programme chu Pacific-a China inluling nasa lutuk tur tihziaawmna tur ṭha tak a ni tih an sawi. China hian South China Sea-a reef leh outcrop-ah a sipaite hmun a sa mek a ni. China chuan AUKUS programme hi dan ang loa nuclear ralthuam neih belh tumna tiin a sawi thung a, mimal tana hlawkna tur bak a ni lo tih a sawi.