Bangladesh-ah dengue a hluar, mi sang chuangin nunna chan tawh

Bangladesh ramah kumin chhung hian dengue a hluar hle a, he natna avang hian mi sang chuang an thih phah tawh tih sorkar report chuan a tarlang.

Kumina dengue vanga nunna chan zat hi nikum aiin a let li zetin an tam a ni.

Dengue natna hi thosi put darh niin, kum 2000-a he natna a darh hnuah, kumin hi Bangladesh-a dengue darh nasat ber kum a ni a, thla kaw chhungin mi 1,017-in nunna chan phah tawhin mi 2,09,000 dawnin dengue natna hi an vei tawh a ni. Kumina thi zingah hian naupang kum 15 hnuai lam 112 an tel a, nausen pawh an tel a ni. Dengue hi a darh nasat em avangin, an ram damdawi inte chuan harsatna nasa tak an tawk mek.

Dengue hi khaw lum leh ruahtui tamna (tropical area) hmunah a hluar ṭhin a, khawsik sang, lu na, luak, luakchhuak, tha na leh bleeding te a thlen thei.

World Health Organization chuan dengue leh virus dang thosi put darh chi, chikungunya, yellow fever leh Zika-te chu sik leh sa inthlak danglam nasa avangin a hluar telh telh dawn tih a lo sawi lawk tawh a ni.

Bangladesh-ah hian dengue natna vei hi kum 1960 khan a lo awm tawh a, mahse, thihna hial thlen theitu dengue khawsik vanga thiput, dengue haemorrhagic fever chu kum 2000 khan hmuh chhuah chauh a ni thung.