Australia hmar lamah ram kang nasa

Australia hmar lama awm Victoria khuaah hnim ro kang (bushfire)-in ram a ti kang nasa hle a, thli lum a tleh tel bawk avangin ram kang hi ṭhelh mih a har zual a ni. Kangṭhelhtute chuan a khaw mipuite chu khua an chhuah san thei lo a nih pawhin sahimna zawng turin an chah.

State Country Fire Authority chief officer Jason Heffernan chuan ram kang hi hectare 17,000 a zau a ni tih sawiin, kangṭhelhtu 650 bawr velin ṭhelh tumin an bei mek tih a sawi. Melbourne aṭanga km 250-a hla Gippdland hmar lamah darkar khata km 80-a chakin thli a thaw tih a sawi bawk.

Emergency service chuan ram kanna bul khaw ṭhenawm pakuaa chengte chu khua chhuah san turin thupek a ti chhuak a, ram kang hian in leh lo bakah mihring nunna atan a hlauhthawnawm tih a sawi. Khaw dang pasarihah chuan him dam taka khua chhuah san ngaihna a awm tawh loh avangin, khaw mipuite chu sahimna zawng thuai turin a hriattir bawk a ni.

"Ram kanna bul ber hma lamah hian kangmei siper a awm reng a, kangṭhelhtute chuan an theihtawp chhuah mah se, ṭhelh mih a har hle a ni," tiin Heffernan chuan a sawi a, chawhnu lamah ruah a sur a beisei thu a sawi bawk.

Hetih lai hian ram chhung hmun dang, Tasmania-a Flinders Island-ah kangmei nasa tak a chhuak ve bawk a, mahse, ruah surin hmun danga a kang kai zel tur erawh a ti ziaawm a ni.

Australia hmar lam ramah hian kum 2019-2020 inkarah khan hnim kang (bushfire) nasa tak a lo chhuak tawh a, ran maktaduai chuangin nunna an chan phah hial. He thil thlen lai hun hi "Black Summer" tiin a hming an vuah nghe nghe.