Nobel Prize 2023 dawng tur puang

Royal Swedish Academy of Science chuan Nobel Prize 2023 dawng tur chu Thawhlehni aṭang khan a puang chhuak ṭan. A hmasa ber atan kumina Nobel Prize for Physiology or Medicine dawng tur puan niin, Katalin Karikó leh Drew Weissman te thlan an ni.

Karki leh Weissman-te hi Covid-19 hri leng laka invenna tur, mRNA vaccine ṭangkai tak siam chhuah theihna tura nucleoside base modification an hmuh chhuah avangin he chawimawina dawng tur hian thlan an ni.

Nimin khan Nobel Prize for Physics dawngtu tur puan chhunzawm leh nghalin, kumin atana he chawimawina dawng tur hian Pierre Agostini, Ferenc Krausz leh Anne L’Huillier-te thlan an ni. Atoms leh molecules chhunga electrons nihphung zir chianna tur hmanrua, enga attosecond pulse siam theihna an siam chhuah avangin chawimawina hi an dawng dawn a ni.

October 5, 6 leh 9-ahte Literature, Peace leh Economic Sciences Prize dawng turte an puang leh ang. He chawimawina hian pawisa fai, Swedish kronor maktaduai 10 (USD 900,000 dawn) a keng tel a, December 10-ah Peace Prize tih loh a dang zawng chu Stockholm, Sweden-ah chawimawina hi hlan an ni ṭhin.