Ukraine-in lei hnuai sikul a sa dawn

Ukraine chuan a ram hmar lam, Kharkiv-ah Russia bomb leh missile laka him tur lei hnuai sikul hmasa ber sak an tum tih Kharkiv mayor chuan a sawi.

Kharkiv hi Russia ramri aṭanga km 35-a hlaa awm a ni a, helai hmun hi Russia chuan nitin deuh thaw thlawhtheihna hmangin a bei ṭhin a ni.

Kharkiv Mayor Ihor Terekhov chuan, "Ukraine lei hnuai sikul hmasa ber tur sak kan tum. Invenhimna tur tharlam ber a ni. Kharkiv-a naupang tam tak chu silai mu leng karah pawh him dam takin lehkha an zir thei dawn a ni," tiin a sawi.

Mayor hian sikul hawn theih hun tur tak hi sawi lo mah se, Kharkiv chuan kum 2023-24 chhung hian zirna atan sum sen a ti tlem dawn lo tih a sawi.

Ral hmatawnga awm khuate chuan indo chhung hian online-in zirna an kalpui hlawm a, Kharkiv-ah erawh chuan sikul kum bul, September 1 hma khan metro station-ah classroom 60 siamin, zirlai sang chuang tan him takin zirna an kalpui thei a ni.

Ukraine ramah hian nikum February 2022-a indo a chhuah hnuah, zirna in 3,800 dawn tihchhiat ni tawhin, zirna in 363 phei chu hman tlak an ni tawh lo.