Zika virus : WHO in health emergency a puang
World Health Organization (WHO) chuan America rama Zika hri leng mek chu a darh chak avangin khawvel pumah health emergency a puang.
Thawhṭanni khan WHO hian emergency meeting neiin, Zika hri lenna ram aiawhte leh mithiamte kawmin, hri leng mek leh a darh dante hi an zirchiang a ni.
Nu, naupai laiin Zika virus a vei chuan a fa hrin chu pianphung pangngai aiin a lu a te a, a thluak lam thlengin a khawih pawi a, kawng hrang hrangin an rualpuite an pha lo a ni.
WHO hi Zika hri leng mek chungchangah chak zawka hma la tura nawr a ni a, Africa khawthlang lama Ebola hri a len khan WHO chu a venna leh khuahkhirhna kawngah che muang lutuka puhin sawisel a lo tawk fo tawh a ni. Ebola hri vang hian mi 11,300 chuang an thi a ni.
WHO chuan South America ram hrang hranga nausen, pian≠phung dik loa piang tam tak awm chu Zika virus vang ni ngeia hriat a nih thu a sawi. Kumin chhungin America ramah hian Zika vei hi mi maktaduai 4 vel an tlin hman rin a thu a tarlang bawk.
Health emergency puan a nih chuan hri leng mek ven leh danna tura hmalak nan sum tam zawk ruahman theih a ni dawn a, hei bakah a enkawlna damdawi leh vaccine siam hna pawh ngawrh zawka thawh theih a ni ang.
Zika virus leng mek hi Brazil ramin a tuar nasa ber a, Brazil Health Minister Marcelo Castro chuan a vei tam tak zingah an natna a langchhuak mai lo a, mahse an test aṭangin he hri hi an lo vei tih finfiah leh a nih avangin he hri hi darh nasa tawh mai thei niin a sawi.
Karleh aṭang hian Brazil ram state tam zawk chuan an laboratory-te chu Zika virus test theihna tur hian an thuam dawn a ni. Castro chuan hri veitu zinga 80% velah chuan an natna hi a langchhuak mai lo a, hei vang hian he hri leng hi kan rin aiin a nasa thei a ni a, hri danna vaccine siam thuai hi kan beiseina lian ber a ni tawh a ni, a ti.
US Centers of Disease Control chuan nu, naupai laite chu Brazil leh Zika hri lenna dang ramte tlawh rih lo turin a ngen. Health official-in list a tihchhuahah hian ram pali telh belhin, an vaiin ram 28 a tling tawh a, hengte hi Latin America leh Caribbean ramte an ni.
Honduras pawhin an rama Zika hri vei an punchak avangin Thawhṭanni khan state of emergencya puang bawk. Health Mi≠nister Yolani Bates chuan nikum December 16 aṭang khan Zika hri vei hi hmuhchhuah a ni a, tunah chuan he hri vei hi mi 3,649 zet an awm tawh niin a sawi. "Nitinin hri vei thar hi an pung zel a ni" tiin Batres chuan a sawi a, mahse nau piang thar zingah Zika virus-in a thlen nia sawi, lu te lutuk, micra≠cephaly tih ang chi erawh hmuh an la awm lo niin a sawi.