Iowa-a vote thlakah Ted Cruz-an Trump a hneh

US President thlanna neih tura party candidate tur thlanna pakhat atan Thawhṭanni khan Iowa-ah nomination contest hmasa ber neiin, vote thlak a ni. Republican presidential candidate chuhtu zingah Ted Cruz chuan vote a hmu sang ber a, thawm nei lian tak Donald Trump chu pahnihna a ni.

Iowa causus-ah hian Democratic lamah chuan Secretary of State hlui Hillary Clinton chuan hma hruai mah se, Vermont Senator Bernie Sanders nen an inthlau lo hle. Clinton-i hian vote tla aṭangin 50.1% a hmu a, Sanders hian 49.3% a hmu thung. Maryland governor hlui Martin O'Malley chu pathumna niin, vote tla aṭagn 0.5% chauh a hmu pha.

Republican candidate zinga vote hmu sang ber, Ted Cruz chuan Iowa-a hnehna a chang chu lawmawm a tih thu a sawi a, media lamah Trump chuan thawm nei lian hle mah se, nominee chu media lam thlan tur a nih lohzia a tilang chiang hle a ni, a ti. Cruz hian vote tla aṭangin 28% hmuin Trump hian 24% a hmu a, Florida Senator Marco Rubio chu pathumna niin vote 23% a hmu.

Donald Trump chuan Cruz hi lawmpuina a hlan a, hemirual hian Republican nomination chu a chan ngei a beisei thu a sawi. Karleh khian New Hampshire-ah primary election hi neih a ni leh ang.

Republican zinga mi, Arkansas governor Mike Huckabee chuan a campaign a tihtawp tur thu a sawi. Huckabee hian kum 2008 khan Iowa inthlanah hian hnehna a lo chang tawh a ni.