WMO-in kuminah khua a lum nasat a ring

United Nations-a World Meteorological Organization (WMO) chuan Nilaini khan thuchhuah siamin kumin hian nasa taka khua a lum an rin thu a tarlang.

WMO-in khawlum lam a chhinchiah chinah Kum 2019 kha khawlum ber kum dawttu kum a ni a, kum 2016 kha khawvela khawlum ber kum a ni thung. "Vanduaithlak takin kumin hian nasa taka khua a lum rin a ni a, boruaka greenhouse gas tam tak chambang khian kan khawvel hi nasa takin a ti lum dawn a ni," tiin WMO Secretary-General Petteri Taalas chuan a sawi. 

WMO chuan kum 2010-2019 kha kum 10 chhunga khawvel a khawlum ber kum record san nasat ber kum a nih thu a tarlang bawk. Nikum vek khan Amazon ram ngaw chu nasa takin a kang a, ram hectare 9,06,000-a zau a kang ral a ni. Hei thil tleng hian khawlum a belhchhah rin a ni bawk. NASA-a Goddard In­stitute for Space Studies director Gavin Schmidt chuan, "A rang thei ang bera khawlum hi tih ziaawm a nih theih nan kan zavaia kan ṭantlan a ngai a ni. Kan thil tih avanga khawlumna thlen thei thil chu a vaiin kan tihtawp vat a ngai a ni," tiin khawlum chungchang a vei zia a sawi chhuak a ni. 

Australia ram kang vangin kumin hian khua nasa taka a lum an ring a, boruaka greenhouse gas tam vang bakah hian  sea level san chhoh zel vangtein khua hi a lum hle an ring.