US-ah Zika virus vei hmuchhuak Sex hmanga inkai theih nia hriat a ni

Latin America rama leng mek, Zika virus chu ram dangah a darh belh zel a, USA-ah pawh he hri vei hi hmuchhuah a ni.

US-a Zika virus vei an hmuh hi Dallas, Texas a mi a ni a, hri veina ramah hian a zin lo a, mahse a kawppui chu Venezuela ramah a zin thung. Hei vang hian Centers for Disease Control (CDC) chuan Zika virus hi mipat hmeichhiat an hmanna aṭanga kai nia a lan thu a sawi. He virus hi a kai ngei tih labarotary test-ah finfiah a ni tawh tih a sawi.

Zika virus hi thosi chi khat, Aedes aṭanga darh a ni a, nu naupai laiin he hri hi a vei chuan a fa chu pianphung pangngai lo, lu te leh thluak puitling lo, microcephaly an ni. Brazil sorkar chuan an rama microcephaly naute 3,670 chuang chu Zika virus vanga thleng a ni ngei em tih an zirchiang mek a, an zinga naute 404 chu Zika virus vang a ni tih finfiah a ni tawh niin a sawi.

Hri leng mek hi thosi seh aṭanga kaichhawn a ni a, sex hmang hian inkaichhawn theih a ni ngem em tih investigator-te chuan an zirchiang mek. Sex hmanga inkaichhawn thei ni ngeia hriat ni mah se, finfiah a la ni lo. Sex hmanga inkaichhawn theih a nih chuan a damdawi leh a hri danna hmuhchhuah a la nih loh avangin ram hrang hrang tan a hlauhawm vek dawn nia sawi a ni.

Hri hi a darh chak avangin World Health Organization (WHO) pawhin Thawhṭanni khan khawvel pumah health emergency a lo puang tawh a ni. Emergency puan anih vang hian hri leng mek venna kawnga hmalakna pawh chak zawka kalpui theih a ni ang.

CDC chuan mipat hmeichhiatna aṭanga inkaichhawn theihna laka invenna tur, inkaihhruaina tihchhuah thuai a tum tih a sawi. CDC hian nu naupai laite chu Zika hri lenna, Latin America leh Carribean ramah zin lo turin thurawn a lo pe tawh bawk. Midang zinte pawh rannung thahna hlo te hmang a, thosi seh tur laka inveng turin an chah bawk.

Zika virus hi kum 1947 khan Uganda ramah hmuhchhuah a ni a, mahse mihring tana hlauhawma ngaih a ni ngai lo. Nikum aṭang chauh khan he hri hi mihring tan a hlauhawm tih hriat a ni. He hri veite chuan khawsik, taksa thak, ruh chuktuah na an neih bakah an mitte a sen bawk. A natna hi Zika hrik pai thosi-in a seh aṭanga ni hnih aṭanga kar khat hnuahte a langchhuak chauh a, a veitu zinga 80% ah phei chuan a langchhuak lo nia sawi a ni.