Karachi airport-a intihbuainaah mi pathum an thi

Pakistan-a Karachi international airport-ah nimin khan security force leh Pakistan Inernational Airlines (PIA) staff-te an intibuai a, mi pathum an thi a, mi dang 12 in hliam an tuar. Buaina chhuak vang hian thlawhtheihna thlawk chhuak tur tam tak a buai phah bawk.

PIA hnuaia pawl hrang hrangte awmna, joint action committee chuan sorkarin privatisation kalpui a tum chungchangah lungawi loin Jinnah International Airport bulah nawrh an huaihawt a, nawrh huaihawta pungkhawm≠te chu security force-te chuan hnawh darh an tum a, an intibuai zui ta a ni. Nawrh huaihawt zinga mi pathum silaia kah fuh an nih avangin an thi a ni.

PIA chairman Nasser Jaffer chuan PIA thawktu pathum an thi chu pawi a tih thu sawiin, PIA chairman a nihna aṭanga banna pawh Prime Minister hnenah a thawn nghal thu a sawi. Jaffer chuan a thurawn pekte tumahin an ngaihsak lo a, joint action committee lam pawhin an buainate chu inbiakna hmanga chinfel tumin hma an la lo a ni, a ti.

Hetihlai hian Deputy Inspector General (East Zone) Kamran Afzal chuan police leh paramilitray rangers-te chuan nawrh huaihawtte lakah silai an hmetpuak lo niin a sawi thung. "Police-te chaun tear gas leh water cannon an hmang a, silai erawh an hmetpuak lo. Police official duty-te chuan mipui pungkhawm zing aṭangin silai hi an hmetpuak zawk niin an sawi. He thil thleng hi kan chhui chiang dawn a ni" a ti. Nawrh huaihawtna hmunah hian silai mu ruak chu chhar ngei a nih thu a sawi bawk.