Israel sipaiten West Bank-a in tihchhiatsak

Israel sipaite chuan West Bank chhim lama thingtlang khua pahniha in 23 chu bulldozer hmangin an chil chhiatsak leh a, mi 100 chuang chenna nei loin an awm phah.

Israel sipaiten in an
ṭhiahsakte hi military area, Firing Zone 918 tiha a vuah huam chhunga awm an ni a, he zone hian ram square km 300 a zau a huam a ni. Kum 1970 khan Israel chuan he hmun hi civil mi awm khapna hmunah a lo puang tawh a ni. Mahse he hmuna chengte chuan Israel-in kum 1967-a West Bank a luahsak hma daih aṭangin tawhin an lo khawsa tawh niin an sawi thung.

Thawhlehni zing khan Israel sipaite chuan bulldozer hmangin Khirbet Jenbah leh Khirbat el-Halawa khuaa in 23 an chil chhiatsak a ni. In an tihchhiat zingah hian Europe ram ṭhenkhatten an sakte pawh a tel. Israel NGO Peace Now chuan an chenna in tihchhiat sak vang hian mi 110 chu chenna in nei loin an awm a, an zingah hian naupang pawh eng emaw zat an tel a ni, a ti.

Israel sipaite hian kum 1999 khan Khirbeh Jennah khua hi a pumin an lo tichhe tawh a, he khuaa chengte hi hmun dangah sawnchhuah an ni. Mahse a hnu reiloteah khaw mite hian kir leh a, an khaw hmun ngaiah an indin thar leh a ni.