US-in Iraq-ah joint military operation chhunzawm
United States (US) chuan hun eng emaw chen a chawlhsan hnuah Nilaini aṭang khan Iraq-a joint military operation a chhunzawm leh ṭan ta.
US sipaiten airstrike hmanga Baghad-a Iran general Qasem Soleimani an thah hnuah, January 5 aṭang khan US chuan joint military operation a neih chu a chawlhsan a ni. US military official pahnih chuan Islamic State (IS) firfiakte beih chhunzawm an nih theihna turin Pentagon chuan joint military operation hi kalpui leh a duh tih an sawi. Mahse joint operation a chhunzawm leh hi Iraq sorkarin a pawmpui leh pawm loh erawh sawichian a ni lo.
Iraq Parliament member-te chuan an rama US sipai 5,000 chuang awmte chhuahtir an duh thu Parliament-ah pawh an lo rel tawh a ni. Mahse US Secretary of State Mike Pompeo chuan Iraq hruaitute hian an rama US sipai dah chu an thlawp reng tih an hrilh niin a sawi ve thung. "Mipui vantlang hriatah sawilang duh lo mah se, a mimal tak chuan firfiakte laka beihpui thlak tura America sipaite an la awm chhunzawm zel chu an pawm vek a ni," a ti.