Brazil-in Zika virus thlentu thosi lakah indo puang
Brazil President Dilma Rousseff chuan Zika virus thlentu, Aedes aegypti laka indo an puang tih sawiin, thosi tirem turin beihpui an thlak dawn tih a sawi.
President chuan Inrinni hian ram pumah beihpui thlakin, sipai leh sorkar hnathawk hrang hrangte chuan in leh office-ah thosi leh rannung thenfai hna an thawk dawn a ni, a ti.
Rousseff-i chun thosi tam zawk chu mihring chenna in leh in bul vela piang a nih thu a sawi.
Zika virus hi America ramah a darh nasa tawh hle a, World Health Organization (WHO) chuan nausen, pianphung pangngai aia lu te-a piang, microcephaly chu Zika virus-in a thlen nia sawiin, khawvel huapin health emergency a lo puang tawh a ni.
President Rousseff-i chuan naupaite leh virus vei naupangte ṭanpui turin sorkar chuan theih≠tawp a chhuah dawn tih a sawi. Thosi tihrem tuma beihpui an thlaknaah chuan an chak lo thiang lo tih sawiin, "He indonaah hian mitinin kan beih a ngai a, thawhhona ṭha kan neih a ṭul. Zika hri veite enkawlna damdawi leh a hri danna siam a la nih loh avangin invenna kawng awmchhun chu thosi tihrem a, a piang zel tur lo ven hi a ni" tiin a sawi.
Brazil sorkar chuan Zika virus lak aṭanga naupaite an himna turin theihtawp a chhuah dawn tih a sawi a, virus vei nausente an enkawlna kawngah a theih anga puih zel an nih tur thu a sawi bawk.
Ram hrang hrangah Zika virus a len hnuin, India rama car siamtu lian, Tata Motors chuan a car siam thar, Zica tia a vuah chu a hming a thlak dawn. Car te chi a siam thar, Zica hi Nilaini khan Greater Noida-a Auto Expo 2016 neihah pholan a ni. Zica hi hi Zippy Car lamtawi atana hman a ni a, mahse company chuan thuchhuah siamin Zika virus leng mek nena a hming a inzul em avangin a hming hi thlak an tum leh ta tih an sawi.
American Red Cross chuan venthawn thilah, Latin America leh Caribbean ram tlawha zinte chuan an haw aṭanga ni 28 hma chuan midangte tan thisen pe lo turin a ngen. Damlo thisen mamawhte hnenah thisen thianghlim ngei pek a nih theih nan fimkhur a ngai tih an sawi. Canadian Blood Servics pawhin Canada ram pawn lama zinchhuakte chu an haw aṭanga ni 21 chhung chu thisen pek a khap bawk.