Australia-in Syria ṭanpuina pek belh dawn

Australia Foreign Mi≠nister Julie Bishop chuan Iraq leh Syria rama tual≠chhung indona tuarte mipui≠te chhawmdawlna atan US dollar maktaduai 18 an pek belh dawn tih a sawi.

Chhawmdawlna an pek tur hi UN High Commissionr for Refugees, UN Children's Fund, World Food Program leh Australia NGO, heng ram pahniha ṭanpui hna thawka awmte hnenah sem an ni ang.

Bishop chuan rorellai leh eptute chuan hun hreh≠awm tak paltlang mek, Syria leh Iraq mipuite ṭanpui tur hian an inlung≠rual hle niin a sawi.

"Ṭanpuina sum kan pek belh hian civil mi tam takte a pui thei dawn a ni" a ti.

Julie Bishop chuan Syria rama mi maktaduai 13.5 velin ṭanpuina an mamawh tih a sawi a, hei bakah hian tualchhung indona vanga himna zawnga ramdanga raltlan maktaduai 4.6 vel an awm bawk a ni, a ti. Iraq ramah hian kumin chhungin chhawmdawl ngai mi maktaduai 10 vel an awm dawn a ni.

Hetihlai hian UN hmalakna-a Syria rama remna leh muanna a awm theihna tura inbiakna neih tum chu tawpsan lailawk a nih thu UN palai chuan a sawi. UN official chuan Syria peace talk neih tum ṭhulh a nih chhan ber chu Russia-in Syria sorkar helte laka beihpui a thlak chhunzawm zel vang niin a sawi.

UN palai Staffan de Mistura chuan Geneva-a peace talk neih tur hi kar thum chhung atan tawpsan a ni rih tih a sawi a, inbiakna hi hlawhtling taka kalpui tur chuan Syria sorkar leh eptute bakah, ram hrang hrang, a bikin US leh Russia puihna an mamawh dawn a ni, a ti.

De Mistura chuan Syria tualchhung buaina chingfel tur chuan sorkar leh helho ten inkahhai an puan phawt a ngai a ni, a ti. Mahse hetihlai hian Syria President Bashir al-Assad-a thlawptu, Russia chuan thlawhtheihna hmangin helho lakah beihpui a thlak chhunzawm reng a ni. Russia Foreign Minister Sergei Lavrov chuan al-Qaida firfiak pawl nena inzawmna neite laka beihpui an thlak avangin, chawlhsan mai an tum lo tih a sawi.