Israel-in West Bank khaw kalpawhna a dang

Jerusalem-a pawi≠khawihna thlentu nia sawi, Palestinian mi pathumte chenna, West Bank hmarlama Qabatiya khaw kalpawhna chu Ningani aṭang khan Israel sipaiten an dang.

Nilaini khan Qabatiya khaw mi pathumte chuan Old Jerusalem-a Israel police-te chu silai leh chem nen an bei a, hmeichhe police officer pakhat thatin, midang pakhat an hliam bawk. Pawikhawihtute hi security force-te chuan an kaphlum ve nghal a ni.

Police-te chuan pawikhawihtute hian bomb lam chi pawh an pai niin an sawi. Jerusalem-a pawikhawihna a thlen hnu hian Prime Minister Benjamin Netanyahu chuan security official-te chu meeting a neihpui nghal a ni. Meeting-ah hian West Bank hmarlama Qabitya khaw kalpawhna dan hi an rel a ni.

Israel police commissioner Roni Alsheich chuan Jerusalem-a police beitute hian an ralthuam kawl aṭang hian Israel mipuite tam tak lakah pawi khawih an tum ngei nia a lan thu a sawi.

Nikum October thla aṭang khan Israel ramchhunga Palestinian-te pawikhawihna hrang hrang thlengah mi 26 an thi a, an zinga American leh Eritean-te an tel. Israel police-te chuan pawikhawihnaa inhnamhnawiha puh, Palestinian mi 164 an kaphlum bawk.