Syria-a beihpui thlakah mi 37 an thi

Russia chuan Syria rama Aleppo bialah Syria sorkar laka helte chu thlawhtheihna hmangin a bei leh a, mi 37 an thi a, an zingah hian naupang pathum an tel.

Syrian activist-te chuan Syria sorkar leh Russia-te hian Aleppo province-a hmun hrang hrangah beihpui thlakin, mi 37 an thi a, thi zat hi an punchhoh zel an rin thu an sawi. Activist-te chuan Russia chu clusber bomb hmangah an puh bawk.

Kum 2015 September thla aṭang khan Russia hian Syria ramah beihpui a thlak ṭan a, a bitum ber chu Iraq leh Syria-a ram zau tak la tawh, Islamic State (IS) firfiak pawl niin a sawi. Mahse khawthlang ram leh Syria eptute chuan Russia hian IS firfiakte aiin Syria hel, President Bashar al-Assad-a kaihhruai sorkar laka lungawi lote a bitum zawk niin an sawi thung.

Syria sorkar chuan Aleppo hmarlamah hian sorkar laka helte lakah beihpui a thlak mek a, kum 2012-a helhoin an lak khaw eng emaw an lakir tawh a ni.

Hetihlai hian Syria tualchhung buaina chinfel dan kawng zawnga United Nations buatsaiha Geneve-a inbiakna neih chu hmasawnna mumal awm loin Nilaini khan tihtawp lailawk a ni. February 25-ah inbiakna hi neih chhunzawm leh a ni ang.

Syria tualchhung indona thleng vang hian mi maktaduai tel chu himna zawngin ram dangah an tlanchhe mek a, Syria raltlante chungchang ngaihtuaha London-a conference chuan raltlante ṭanpuina atan pound tluklehdingawn 7 pek an rel.

Syria raltlante ṭanpuina atan hian kuminah pound tluklehdingawn 4.1 pek a ni ang a, kum 2020-ah pound tld 3.4 pek belh leh a ni ang. Britain chuan ṭanpuina atan hian pound maktaduai 510 a pek belh bawk a, hei nen hian a sum thawh hi pound mtd 2.3 a tling a ni.