Europe-ah Zika virus vei hmuchhuak

Latin America leh Caribbean rama leng mek, Zika virus chu a darh zel a,US-ah Zika hri vei hmuh a nih hnuin Europe ramah pawh a vei hmuhchhuah a ni.

Spain chuan an ramah nu pakhat, naupai lai chu Zika virus hi a vei tih finfiah a nih leh tih an sawi a, hemi hma hian Ziak virus vei hi mi paruk hmuh an lo ni tawh bawk. Spain health ministry chuan Zika vei an hmuhchhuah hi tunhnaiah Cambodia ramah a zin a, heta ṭang hian a kai nia an rin thu a tarlang. Zika virus veite hi an ngaihtuahawm lo niin a sawi.

Zika virus hi Aedes thosi seh
aṭanga kai theih a nih bakah, mipat hmeichhiat hmanna aṭang pawhin kai theih nia hriat a ni a, mahse hei hi finfiah a la ni lo. US-a virus vei an hmuh hi Texas state a mi a ni a, Zika hri lenna ramah amah a zin lo a, a kawppui a zin avangin a hnen aṭang hian a kai nia rin a ni.

Hri leng tuar nasa ber, Brazil ramah chuan Zika hri thlentu, thosi tihrem tumin beihpui thlak mek a ni. Sorkarin thosi pian theihna chi tui tlingte tibo tura a ngen bakah, rannung thahna hlo hmang tura mipuite thurawn a pek avangin hralh a kal nghal hle. US firm SC Johnson chuan thuchhuah siamin, rannung thahna OFF! repellent chu Brazil ramah tam zawk siamchhuah a tum thu leh, Brazil sorkar nen an thawkdun mek tih a sawi.

Brazil thuneitute chuan Zika virus hi thisen inpek aṭangin mi pahnihin an kai tawh tih an sawi. University of Campinas blood center-a director, Marcelo Addas Carvalho chuan kum 2015, March thla khan Zika hri veiin thisen a pek chu a thisen dawngtuin a vei ve nghal thu a sawi a, April 2015 khan midang pakhatin a thisen dawn aṭangin a kai bawk.

America Red Cross chuan Zika hri lenna rama zinte chu an haw hnuah pawh thisen pe mai lo tur leh, ni 28 tal nghak phawt turin a lo ngen tawh a ni.