IS member zat a tlahniam

US intelligence report tihchhuah thar chuan Syria leh Iraq-a Islamic State (IS) firfiak pawl member zat chu a hmaa 31,000 vel nia rin aiin an tlem tawh a, tunah hian mi 25,000 an ni mek niin a tarlang.

Ningani khan White House chuan intelligence report hi a tlangzarh a, ṭangrual ramten firfiakte laka beihpui an thlak nasat avangin member zat hi an kiam chak hle niin official-te chuan an sawi.

Intelligence chuan IS hi ram hrang hrangte tan la hlauhawm mah se, member a neih zat erawh a tlahniam chak hle nia a ngaih thu White House thupuangtu, Josh Earnest chuan a tarlang.

Earnest chuan, "US kaihhruaia ṭangrual ramten IS firfiakte laka beihpui an thlak chuan nghawng lian tak a nei mek a ni" tiin a sawi. Ṭangrual ramte hian thlawhtheihna hmangin beihpui an thlak a, khawmuala indonaah erawh chuan an tello thung. US kaihhruaiin ṭangrual ramte hian firfiakte hmun hi
ṭum 10,000 aia tam an bomb tawh a ni.