Coronovirus hi China aṭanga lo kal a ni : Trump
US president Donald Trump chuan khawvel puma hripui leng mek, coronavirus chu China aṭanga rawn kal a ni a, hemi chungchang hi US chuan a ngaizam mai mai dawn lo tih a sawi leh.
Michigan-a Listening Session with African-American Leaders an neihnaah Trump chuan hei hi sawichhuak lehin, "He hri hi China aṭanga rawn kal ngei a ni a, kan lawm hlo hle a ni. Insumdawn tawnna tura inremna kan ziak fel chauh a, kan pen tui pawh a hul hmain hetiang thil hi a rawn thleng a ni. Kan ngaizam mai dawn lo," a ti.
Trump hian hri leng chungchanga China demna thu hi a sawi fo a, China chu an ram aṭanga hri darh chhuak tur thunun zo loah a puh a ni. World Health Organisation (WHO) pawh hri leng a dona kawnga a hma lak danah sawiselin, China lam awnah a puh a, WHO hnena US-in fund a pek ṭhin pawh a lo titawp tawh bawk.
US-in Covid-19 vaccine siam a tumna pawh China hian tihbuai a tum nia puh a lo ni tawh bawk a, hei vang hian Ningani khan Chinese Communist Party-in American Covid-19 vaccine research neih mek a ruksak leh tihbuai theihna tura venna, Covid-19 Vaccine Protection Act chu senator Ted Cruz and Rick Scott, Mike Braun, Marsha Blackburn, Joni Ernst, Martha McSally leh Tom Cotton-ten an pulut a ni.
Hripui leng vang hian US-ah hna nei lo, sorkar aṭanga hna nei lote chhawmdawlna dil chu thla hnih chhungin mi maktaduai 39 dawn an awm tawh niin sorkar report chuan a tarlang. Hri darh tur venna atan inkharkhipna kalpui a nih avangin sumdawnna hmunte pawh hna an la thawk mumal thei lo a, hei hian an ram sum dinhmun pawh a nghawng tawh hle tih Labour department chuan a sawi. Kar liam ta chhung khan hna nei lo in report thar hi mi maktaduai 2.4 vel an awm.
Covid-19 vanga thite zahna lantir nan US flag ngul chanveah zar dawn
President Donald Trump chuan an rama Covid-19 dona kawnga thite zahna lantir nan, kar leh Thawhṭanni aṭangin an ram puanzar chu ni thum chhung a ngun chanveah zar a ni dawn tih a sawi.
Kar leh Thawhṭanni hi US Memorial Day a ni a, hemi ni hi ram tana nunna hlante hriatrengna atan hman ṭhin a ni.
Trump chuan sorkar building zawng zawng leh national monument-ahte an ram puanzar chu ni thum chhung a ngul chanveah zar a ni dawn tih a sawi. Ram tana an inpekna leh nunna an hlan avangin chawimawi an phu tih a sawi bawk.