Israel-in West Bank-ah 'Nature reserves' pasarih siam dawn
Israel defence minister Naftali Bennett chuan Palestinian ram a luah, West Bank-ah nature reserve pasarih an siam dawn tih a sawi. Hei hi a ram luah china Israel-in a thuneihna a tihnghehna tur leh , Juda-te chenna tur hmun siam belh zel theihna tura a ruahmanna nia sawi a ni.
Nature reserve an siamna tur hmun hi West Bank-a Area C huamchhunga awm vek an ni. He hmun hi nikum September thlaa prime minister Benjamin Netanyahu-an luah belh an tumna hmun nia a sawi kha a ni. Area C hian West Bank hmun zau lam 60% luahin, Israel thuneihna hnuaia awm a ni.
Defence minister Bennett chuan nature reserve an siamna bial hi Israel ta a ni tiin, an thil siam pawh hi Israel Nature and Parks Authority hnuaia awm tur a nih thu a sawi. Hetih lai hian Palestiniain Authority (PA) chuan Israel thiltih hi na takin a sawisel nghal a, United Nations leh international court-ah complaint thehlut an tum tih Palestinian foreign ministry chuan a sawi.
Israel settlement watchdog, Peace Now in a tarlan danin, nature reserve siamna hi ram hectare 5,300 a zau niin, 40% chu mimal, Palestinian mite ta niin a sawi. Mahse Israel-in nature reserve dan a siam hnuaiah, Palestinian-te chu anmahni ram ngeiah pawh thlawhhma an lak phalsak an ni lo.