Open Skies treaty aṭangin US inhnuhdawh tum
US president Donald Trump kaihhruai US sorkar chuan thla ruk chhungin Open Skies treaty aṭanga inhnuhdawh a tum.
Open Skies treaty hi kum 2002 January khan siam a ni a, he treaty-ah hian member ram 35 an awm mek a ni.
He inremna hnuaiah hian member-te bikah hian an ram huam chinah, unarmed surveillance flight (indona emaw ralthuam emaw phur lo thlawhtheihna) thlawh tir phal a ni a, he flight kaltlang hian member ram te sipai neih zat, military facility leh thildangte hriat theih a ni ṭhin.
US-in he treaty aṭanga inhnuhdawh a tum chhan hi Russia laka a lungawi loh vang a ni. Russia chu treaty dan bawhchhiaah a puh a, technical lama inbiak duh loah a puh bawk. Russia-ah hian unarmed surveillance flight thlawk lut mah se, an rama hmun ṭhenkhata an sipai leh military facility-te chu an thup tlat niin US chuan a puh a ni.
Russia foreign ministry chuan dan an bawhchhiat loh thu a sawi thung. US chu he treaty aṭanga inhnuhdawh a tum avanga pawi an tih thu leh inngaihtuah ṭha leh se an duh thu a tarlang. Russian deputy foreign minister Alexander Grushko chuan US chu he treaty aṭanga a inhnuhdawh chuan a member puite tan a pawi theih thu sawiin, he treaty-a North Atlantic Treaty Organisation (Nato) member nikawp te chu a nghawng nasa leh zual thei, Europe ramte nena inkungkaihna pawh a chhiat phah thei niin a sawi.
Nikum khan US chu Russia nena an thawhdunna pakhat, Intermediate-Range Nuclear Forces Treaty aṭangin a lo inhnukdawk tawh bawk.
Open Skies treaty hi kum 1955 khan US president Dwight Eisenhower chuan Russia nena an thawh dun theih nan din a rawt a, Russia-in kum tam a duh loh hnuah kum 1992 khan din chauh niin, ram leh ram inkara inrin tawnna a awm theih nan mumal takin kum 2002 January 1 aṭang khan kalpui ṭan a ni.