Damdawi-inah Donald Trump dah lut

US president Donald Trump chu Covid-19 a kai tih hriat a nih hnuah, anni huna kar liam ta Zirtawpni zan khan Bethesda, Maryland-a sipai damdawi-in, Walter Reed National Military Medical Center-ah enkawl tura dah luh a ni.

October 1 khan Trump leh a nupui Melania Trump chu Covid-19 an kai tih hriat chhuah a ni a, in lamah an in quarantine nghal bawk a ni. Mahse Trump hian khawsik a neih avangin October 2 zan khan helicopter hmangin sipai damdawi-ina enkawl turin hruai a ni. 

Mahse Inrinni khan khawsik a nei tawh lo tih damdawi-in lam chuan an sawi. First Lady erawh White House-ah a inkhung hrang thung. 

Damdawi-in lam a pan hma hian Trump hian video tawite a twitter lamah a phochhuak a, damdawi-in pan tura a kal dawn thu sawiin, a dinhmun pawh a ṭha hle a, ngaihtuahawm a nih loh thu leh a nupui pawh a ṭhat  thu a sawi bawk. Hei bakah hian mipuiin amah an thlawp tlatna avanga a lawm thu pawh a sawi lang.

Thla leh lawk hian US president thlanna neih a ni dawn a, hemi atan hian Trump leh a khing pui Joe Biden chuan campaign ngawrh takin an nei chho ṭan mek a ni. Mahse Trump hian hri a kai tak avangin tun hnaia a campaign tur zawng zawng pawh a ṭhulh rih a ngaih phah a, October 15-a Biden nen debate vawi hnihna an neih leh tur pawh ṭhulh a ni dawn nge, thu chiang engmah a la awm lo.

Kum 74 mi Trump chu damdawi-in aṭanga dam taka rawn chhuak leh thuai turin ram hrang hrang hruaitute chuan duhsakna an hlan. Duhsakna hlantu zingah hian China president Xi Jinping pawh a tel. 

North Korea hotupa Kim Jong Un chuan US president Donald Trump leh a nupui, Melania Trump chu dam leh thuai turin a duh thu a sawi.

Hemi chungchang hi Korean Central News Agency (KCNA) chuan a tarlang a, Trump leh a nupui chuan he hri hi an hneh ngei a rin thu Kim chuan a sawi a, an dam leh vat a rin thu pawh a sawi bawk.

South Korea-a Yonhap news agency chuan khawvela ram hruaitu Covid-19 hri kai zingah Kim hian Trump chiah hi duhsakna a hlan awm chhun niin a tarlang.

President Trump-a'n Covid-19 a kai tih hriat a nih hnuah, Democrats presidential candidate Joe Biden leh a nupui, Jill-te pawh test ve nghal an ni a, mahse an ni erawh chu an result a negative a ni. 

Biden chuan a twitter-ah an test result a negative thu sawiin, an nupain President Trump leh a nupuite pawh an dam thuai theihna atan duhsakna an hlan tih a sawi. 

Biden chuan an rama hri leng mek chungchangah mitinte chuan an mawhphurhnate hria a, mithiamte thurawnte ngaithla a, kut sil uar, social distancing vawn leh pawn chhuahnaa mask vuahte chu ngai pawimawh turin a chah nghal. Biden chuan hri leng chungchangah President leh First Lady-te chu beih a duh loh thu a sawi rualin, an rama hri leng dona kawnga President hma lak dan chu awmze nei lo tiin a sawi zui.