Hamas-te beihna Israel-in na takin chhang let

Gaza Strip-a rorel lai, Palestinian militant group Hamas te'n Inrinni khan rocket hmangin Israel chhim lam an bei a, hei hi Israel chuan na takin a chhang let nghal.

Hamas-te hian rocket an kah chhuah hnuah, Gaza hungnate tichhiain a bul hnaia Israel khua leh military post-te an bei zui bawk. Israel laka beihpui an thlakna hi "Operation Al-Aqsa Flood" tiin, West Bank leh Arab leh Islam ram mite chu tel ve turin a sawm. Hamas hotu, Islmael Haniyeh chuan a pawlte chuan hnehna an chang ngei dawn niin a sawi. Hamas-te beihna avang hian Israel mi 250 vel an thih bakah, mi eng emaw zat an man bawk. Thi zingah hian police officer 30 an tel nia sawi a ni. Israel chuan Hamas-te'n an kidnap-te hi sipai leh civil mi 100 vel an tling niin a sawi.

Israel chuan Inrinni zan khan Hamas-te beihna hi chhang let ve nghalin, Israel sipaite chuan 'Operaton Swords of Iron' an kalpui ve nghal a, Gaza Strip-a Hamas mi leh sate in leh, tunnel eng emaw zat an kap chhia a, Palestinian mi 300 chuang an thi tawh a, hlim tuar mi 1,700 vel an awm bawk. Nimin pawh khan Gaza hi a la beih chhunzawm zel a ni.

Israel prime minister Benjamin Netanyahu chuan Hamas-te'n an ram an beihna ni chu Israel tan 'black day' a ni tiin, na taka phuba lak let a ni dawn tih a sawi. PM chuan Israel sipaite chuan an theihna zawng zawngin Hamas-te tichhe vek turin an bei dawn a, Israel leh a mite beitute lakah chuan a tawp thlengin phuba an la dawn tih a sawi a ni.

Netanyahu chuan Gaza-a Hamas ho bul hnaia cheng, Palestinian-te chu inthiarfihlim tura hrilhin, ''Gaza mipuite inthiarfihlim vat turin ka hrilh duh che u, kan theihna zawng zawngin kan rawn che chhuak dawn a ni," a ti.

Israel defence minister Yoav Gallant chuan, "Hamas chuan pawikhawihna rapthlak tak an thleng a, hmeichhia, naupang leh kum upate pawh thliar loin an che a ni. Mahse an thil tihsualzia hi rei loteah an hmu vat dawn. Gaza Strip dinhmun hi kan thlank danglam vek dawn," tiin a sawi bawk. Gaza Strip ramri hnaiha cheng, Israel mite chu darkar 24 chhungin hruai chhuah vek an tum tih nimin khan Israel sipai thupuangtu, Daniel Hagari chuan a sawi.

Ram hrang hrangte chuan Hamas-te'n Israel an bei chu an dem thu sawiin, Israel chu a ram venghim tura che chhuak turin dikna a nei a ni, an ti. Israel ram ṭhianṭha, US pawhin Israel a thlawp thu sawi chhuakin, UN president Joe Biden chuan Israel tan an ding tlat dawn tih sawiin, Israel dodal tumte a vau lawk bawk a ni.

United Nations Security Council (UNSC) chuan nimin khan Hamas leh Israel-te inbeihna thleng mek chungchangah emergency meeting a ko.