Pakistan-ah vur tawlh vangin mi 77 thi
Pakistan hmarchhak ramah Thawhlehni khan nasa takin vur a tawlh a, mi 77-in an thih phah tawh bakah mi 94 an hliam.
Kashmir ram, Neelum Valley-a vur sur nasat lutuk avangin vur tawlh hi a insiam niin tualchhung mite chuan an sawi a, in tam tak a tichhe bawk a ni. State Minister for Disaster management Raza Qadri chuan vur tawlh chuan in tamtak a tih chhiat mai bakah tamtak chu vur hian a chhilh hnan a, thi tam takte hi vurin a chhilh hnana mite an ni, a ti.
Hliam ṭhenkhatte hi army helicopter-in Muzaffarabad thlenpui an ni tawh a, tang eng emaw zat an la awm bawk avangin mitthi awm zat pawh hi a pun leh rin a ni. Emergency a thawk tura ruatte chuan chhiatna thlenna hmunah hian chhanchhuah hna an thawk a, tualchhung mite pawh suahdur nen thawkchhuak ve bawkin ruang zawn hna an thawk a. Pakistan Prime Minister Imran Khan chuan national disaster agency, military leh federal minister-te chu chhiat tawkte ṭanpui tur in a ti ve bawk a ni.
Kashmir (Pakistan hnuaia awm chin) chuan vur tawlh hi an tuar nasa ber a, kawng a hnawh nasat mai bakah inbiakpawhna tam tak a chhia a, electric supply pawh a mumal thei lo a ni. Balochistan-ah chuan darkar 48 chhungin ruah leh vur vangin mi 16 an thi tawh tawh tih Provincial Disaster Management hotu Imran Zarkoon chuan a sawi ve bawk.