Hei hi kan 9/11 a ni - Israel; Israel-Gaza inbeihnaah mi 1,100 chuang thi tawh

Palestinian militant group, Hamas-te'n kar liam ta Inrinnia Israel chhim lam an bei thut chu Israel tan chuan kum 2001, September 11-a firfiakte'n US an beih thut ang mai kha a ni tih Israel sipaite chuan an sawi.

Israel sipai thupuangtu Richard Hech chuan, 'Hei hi kan 9/11 a ni," a ti. Mi ṭhenkhat chuan Hamas-te'n an beihna chu 1941-a Pearl Harbor beih ṭum nen te an tehkhin bawk.

Hamas-te'n Israel chhim lam an beih hnuah, Israel sipaite hian Hamas rorelna, Gaza Strip chu na takin an bei zui ve nghal a, nimin thleng khan Gaza ramri bula hmun pariat velah an la inbei chhunzawm a ni.

Israel leh Gaza inbeihnaah hian mi 1,100 chuang an thi tawh nia sawi a ni a, Israel ramah mi 700 vel leh, Gaza Strip-ah mi 400 chuang an thi tawh. Hliam tuar hi mi 2,000 chuang an awm tawh bawk.

Gaza Strip-a cheng zinga mi nuai 1.23 chu an hlauhthawn avang leh an in tihchhiat a nih avangin hmun dangah an tlanchhe tawh. Office for the Coordination of Humanitarian Affairs (OCHA) chuan school hrang hrangah himna zawnga tlanchhia mi 73,000 vel an khawsa mek tih a sawi bawk. Israel chuan Hamas beihna a chhan let dawn hian, mi maktaduai 2.3 chenna Gaza Strip-a cheng civil mite chu inthiarfihlim turin a lo hrilh lawk a ni. Prime minister Benjamin Netanyahu chuan, "Kan theihna zawng zawng hmangin khawi hmun pawh kha kan rawn hmatiam dawn a, chuvangin Gaza mipuite kha lo inthiarfihlim rawh u," tiin a sawi lawk.

Hamas official-te chuan Israel mi 100 chuang an hreng mek tih an sawi. Hetih lai hian Israel sipaite chuan Gaza border hmun tam zawk chu an thunun tawh tih sawiin, mi tam tak an man bawk. Hemi rual hian hmun ṭhenkhatah Hamas firfiak lo tawm ru an la awm theih thu an sawi. Israel hian Gaza rarmi bulah sipai reserve nuai khat vel a dah tawh a ni.

Kar liam ta Inrinnia Hamas-te'n Israel an beih thutnaah Iran chuan a pui nia sawi a ni a, mahse, hei hi Iran chuan pha thung. Iran Mission chuan Palestinian-te chu an thlawp reng thu a sawi rualin, Israel an beihnaah hian an inrawlh ve lo niin a sawi.

Israel pui turin US-in military ship leh aircraft a tir

US chuan Hamas leh Israel-te inbeih meknaah Israel a thlawp thu a sawi hnuah, Israel sipaite chhawmdawlna a pek chu a tihpun tur thu a sawi bakah, Israel puihna turin military ship leh aircraft a tir nghal.

US defence secretary Lloyd Austin chuan Israel sipaite chhawmdawlna an tihpun tur thu a sawi a, Israel ram bulah military ship leh aircraft eng emaw zat a tir dawn tih a sawi bawk. A ṭul huna Israel pui tura che chhuak turin Eastern Mediterranean-ah Ford carrier strike group chu lo inralring reng turin a dah dawn a ni. US hian aircraft carrier changtlung ber, USS Gerald R. Ford bakah cruiser USS Normandy leh destroyer USS Thomas Hudner, USS Ramage, USS Carney leh US Roosevelt te leh, Air Force F-35, F-15, F-16, leh A-10 fighter aircraft squadron-te a dah dawn a ni.

Hamas chuan US thiltih hi na taka dem nghalin Israel sipaite puih a tumna chu Palestinian rahbehnaah a tel ve tih tilangtu a ni, a ti.

US president Joe Biden chuan Pathianni khan Israel prime minister Benjamin Netanyahu biain, Israel sipaite puihna tur an thawn nghal tur thu hi a hrilh. US vice president Kamala Harris pawhin Israel president Isaac Herzog a be bawk.

Indonaa tel turin PM hlui thawk chhuak

Israel prime minister hlui, Naftali Bennett chu Gaza border-a Israel reserve sipai, Hamas do tura kalte zingah a tel.

Naftali Bennett hi Israel sipai, Israel Defence Force (IDF) uniform nena inthuamin, reserve duty tur hian a thawk chhuak a ni. Bennett hi Israel prime minister 13-na a ni a, mahse, a kaihhruai sorkar hi kum khat pawh a ding tling hman lo a, nikum July 1 khan PM-ah lak luh niin, November 8-ah sorkar hi a tla leh nghal a ni.

Gaza hmun tam zawkah power supply nei lo

Israel-in Gaza Strip tana power supply chu a tihtawp avangin hmun tam zawkah power an nei tawh lo. Gaza ram chhungah hian electricity an mamawh zat aṭanga 20% vel chauh an siam chhuak a ni. Ei tur leh tui supply thlengin a bahlah tawh bawk.

Israel sipaite chuan fighter jet, helicopter leh artillery hmangin Gaza Strip-a target 1,000 chuang an kap chhe tawh tih sawiin, heng zingah hian Hamas hmun pawimawh te, Hamas hruaitute in leh an pawl enkawl bank-te pawh a tel.

Israel Prime Minister Office chuan an tum ber chu kum tam tak chhung Hamas-te chu Israel mite vau leh Israel tana hlauhawm ni thei tawh lo tura an chakna leh inrelbawlna zawng zawng tihchhiat vek a ni tih a sawi.