Israel PM duh lohna lantir chhunzawm

Israel rama hripui leng vangin lockdown puan ni mah se, kar liam ta Inrinni khan prime minister Benjamin Netanyahu leh a kaihhruai sorkar duh lohna lantirin mi tam tak chhuak khawmin nawrh an huaihawt. 

Sorkar chuan an rama hri leng thawh hnihna a thlen hlauhthawn avangin lockdown a puang leh a, mipuite pawh pawn chhuak lo turin a ti a ni. Mahni chenna in aṭanga km khat huam chhungah bak awmkhawm pawh a phal lo a,  pawn chhuakte pawh social distancing dan zawm tura tih an ni bawk. 

Khuahkhirhna siam ni mah se, Tel Aviv-ah chuan mi sang tel chu kalkhawm luiin PM duh lohna an lantir a ni. Police-te chuan pungkhawmte hi hnawhdarh an tum a, an zinga ṭhenkhat nen innawr buaiin  mi 15 man an nih tih an sawi.