Israel-Hamas war : Israel-in Gaza ramrite thunun vek tawh

Israel sipaite leh Gaza Strip-a rorel lai, Palestinian militant group, Hamas-te chu a ni lina atan nimin thleng khan an la inbei chhunzawm zel. Hetih lai hian Israel sipaite chuan Gaza ramrite chu an thunun vek tawh tih sawiin, Gaza Strip-a tui leh power supply-te pawh an tihtawpsak a ni.

Israel hian Thawhṭanni zan khan Gaza Strip-a hmun 200 chuang chu an kap leh a ni. Israel-in jet hmanga nasa taka beihpui thlak a nih hnuah Hamas-te dinhmun pawh a chhe ṭan tawh a, Hamas chuan Israel-in civil mite chenna in an bomb apiangin Israel mi an hren mekte chu an tihlum zel dawn tiin an vau.

Thawhṭanni aṭang khan Gaza aṭangin Hamas firfiak, Israel rama lut hi a awm belh tawh lo niin Israel sipai thupuangtu, rear admiral Daniel Hagari chuan a sawi.

Israel chuan Gaza border-a duty tura inpe, volunteer-te chu nimin aṭang khan assault rifle a sem ṭan. National security minister Itamar Ben-Gvir chuan a thawh khatnaa Israel siam rifle 4,000 an sem chhuak phawt a, a dawtah 6,000 an pe leh dawn tih a sawi. Volunteer-te hi helmet leh flak jacket sem vek an ni bawk ang.

Israel prime minister Benjamin Netanyahu chuan Hamas te vauna thu na tak tichhuakin, "Indo hi kan duh lo. Mahse a rawng thei ang berin indo lo thei loin min nawr lut a ni. Israel chu indona ṭantu ni lo mah se, a khartu a ni ang," a ti.

United Nations secretary-general Antonio Guterres chuan inbeihna chu titawp tawh turin Israel leh Hamas te chu a ngen. US president Joe Biden, Germany chancellor Olaf Scholz, UK prime minister Rishi Sunak, France president Emmanuel Macron leh Italy prime minister Giorgia Meloni-te chuan Thawhṭanni khan thuchhuah inṭawm siamin, Hamas-te'n Israel an bei chu an dem thu leh, Israel an thlawp tlat tur thu an sawi. An chet dan chungchangah Hamas-te chuan insawi thiam leh insawi fiahna tur engmah an nei lo a ni, an ti. US secretary of state Antony Blinken chuan Hamas-te'n Israel an beih hnua an mi man leh hrente chu chhuah vek tura an phut thu a sawi bawk.

US top general chuan Thawhṭanni khan Israel ram beihnaah inrawlh ve lo turin Iran a vau bawk. Joint Chiefs of Staff chairman, general Charles Q Brown Jr. chuan Lebanon armed group, Hezbollah-te'n Israel hmar lama rocket an kah ve leh hnuah vauna thu hi sawiin, buaina hi a punlun zel an duh lo a, hei vang hian Iran pawh lo inrawlh ve lo turin a ti a ni. Inrinni liam taa Hamas firfiakte'n Israel chhim lam an beihnaah khan Iran chu a phenah a tel ve nia puhna awm mah se, an puhna hi Iran chuan a pha thung a ni.

Turkey president Recep Tayyip Erdogan chuan Israel-Hamas inbeihna titawp a, inremna a awm theihna tura palai hna thawk turin Turkey chu a inpeih tih a sawi. An mi hrente inthleng tawn theihna tura inbiakna neihpui pawh a inhuam thu a tarlang.

Israel Health Ministry chuan kar liam ta Inrinni aṭanga Hamas-te an beihnaa Israel mi thi chu 900 vel tling tawhin, mi 2,600-te an hliam niin a sawi. Palestinian thuneitute chuan Israel sipaite beihna avanga Gaza Strip-a thi hi mi 794 an ni tawh a, mi 4,000 an hliam tih an sawi bawk. Gaza-a hospital hrang hrangah damdawi mamawhte lak luh a nih theihna atana kawng hawng turin Palestinian Health Ministry chuan a ngen.