Israel-Hamas indo, ni 5-na : Israel sipaite'n an rama lut ru mi 1,000 chuang that tawh

Israel leh Palestinian militant group, Hamas-te chu nimin khan a ni ngana atan an la indo chhunzawm zel.

Israel sipaite chuan Hamas-te'n Israel an beih ṭan ni, kar liam ta Inrinni aṭang khan an rama lut ru, Palestinian gunmen 1,000 chuang an that tawh tih nimin khan an sawi. Israel sipai thupuangtu, rear admiral Daniel Hagari chuan Gaza Strip an beih letnaah Hamas-te aircraft an chhui zuina advanced system pawh an tihchhiatsak zingah a tel thu a sawi.

Thawhlehni khan US president Joe Biden chuan Israel prime minister Benjamin Netanyahu chu be lehin, US-in a puih dan tur chungchangte an sawi dun. Hruaitu pahnihte hian inbiak chhunzawm leh thuai an tum tih an sawi bawk.

US-in Israel sipaite a puihna tur ralthuam phurtu thlawhtheihna chuan Thawhlehni khan Israel chhim lam a thleng. Israel Defence Force (IDF) chuan US thlawhtheihna hi Nevatim Airbase a thlen thu an sawi a, mahse, eng ang hmanrua leh ralthuam nge an dawn erawh an sawi lang lo.

Israel defence minister Yoav Gallant chuan vawiin hian NATO member-te chu video kaltlangin inbiakna a neihpui dawn a, Hamas firfiakte;n an beih chungchang leh, an ram dinhmunte a sawi dawn a ni. NATO chief Jens Stoltenberg chuan NATO chuan firfiakte'n Israel bei a, pawisawi lo mi tam tak an that chu a dem tak zet tih a sawi.

Pope Francis chuan Islamist group, Hamas chu Israel mi an hren mekte chhuah vek turin a ngen. Hemi rual hian Israel-in Gaza Strip pumpui beih vek a tum chungchang chu ngaihtuah a ngai tih a sawi bawk. Pope chuan, "Firfiakte beihna laka lo inveng a, an ram humhimna atan bei let turin dikna an nei a ni. Mahse Palestinian chenna, Gaza pumpuia beihpui thlak a tum chu ngaihtuah thui a ngai hle, he hmunah hian pawisawi lo mi tam tak an awm ve bawk a ni," a ti.

Gaza-a power authority chuan Israel-in power supply a tihtawp sak hnuah leh, ramrite khar vek a nih hnuah Gaza-a power plant awmchhun chuan fuel a ngah tawk tawh lo a, khar mai a ngai thuai dawn niin an sawi. Hamas-te'n Israel an beih hnuah Israel sorkar chuan Gaza ramrite a khar nghal vek a, hei vang hian power plant-a hman tur leh, hospital-a generator-te hman tur fuel pawh lak luh theih a ni tawh lo a ni. Power plant hi nimin chawhnu lam khan khar a ngai tawh dawn niin thuneitute chuan an sawi. Gaza-a cheng mi mtd 2.2 chuan fuel bakah ei tur leh tui pawh an tlachham ṭan tawh a ni.

Palestinian interior ministry chuan Gaza aṭanga tlanchhiat ngaihna a awm lo tih a sawi. Israel-in an ram aṭanga luhna, border crossing a khar avang leh, Rafah border crossing hmanga Egypt rama luhna tur pawh Israel air strike-in entry gate a tihchhiat avangin tumah an kal thei lo. Egypt lam aṭang pawh hian ei tur leh mamawh dangte engmah thawn luh a la ni lo bawk.