Khawvela mai rit ber kg 1,247

California, US-a Half Moon Bay-a 50th World Championship Pumpkin Weigh-Off neihah Travis Gienger chuan a mai, pound 2,749 (kg 1,247)-a rit chu pakhatna nihpuiin, lawmmanah USD 30,000 a dawng.

Kum 43 mi, Minnesota aṭanga tel, horticulture teacher Gienger hian kum 30 dawn chu mai a lo ching tawh a ni. Giener hian a mai hi a in hnung lamah chingin, kuminah hian kum dang aiin a enkawl uluk zual tih a sawi. Ni khatah tui vawi 12 pein, lei ṭha pawh kum dang aiin a pe ngun bawk.

Guinness World Records in a tarlan danin, mai rit ber record ding lai chu Italy rama thar, pound 2,702 (kg 1,226)-a rit a ni a, mahse, Gienger-a mai hian he record hi a rawn khum ta a ni.

50th World Championship Pumpkin Weigh-Off -a mai rit bera thlan hi tun kar tawpa Art and Pumpkin Festival neihah pho lan a ni ang.