Israel-Hamas war: Hamas mi hrente chhuah an nih hma Israel-in tui leh fuel hrek dawn

Israel sipai leh Palestinian militant group, Hamas-te indo mekah, Israel chuan Hamas-te'n kar liam ta Inrinnia Israel an beih ṭuma an mi mante an chhuah vek hma chu Gaza Strip tan tui leh fuel a hrek dawn a, chhawmdawlna pek luh tur pawh a dang dawn tih enerngy minister Israel Katz chuan a sawi.

Israel sipaite hian hian a ni rukna atan nimin khan Gaza an beih chhunzawm leh a ni. Israel prime minister Benjamin Netanyahu chuan Hamas-te laka phuba lakna tura hma latu tur, wartime cabinet a din. Nilainia TV kaltlanga ram mipuite tana thuchah a sawiah, PM chuan Hamas-te chu tihchhiat vek an ni dawn tih sawiin, "Hamas member tawh phawt chu mitthi an ni ang," a ti.

Wartime cabinet din tharah hian PM bakah defence minister hlui Benny Gantz leh defence minister ṭanglai, Yoav Gallant-te an awm dawn a, indona kaihhnawih thil chauh an ngaihtuah dawn a ni.

Gaza official-te chuan fuel an neih tawh loh avangin Gaza Strip-a power plant awmchhun chu Nilaini khan khar a ni a, generator an ring chho tawh a, hei hian mipuite harsatna a belhchhah nasa hle tih an sawi. Hospital-te pawhin power supply an nei tawh lo a, water plant panga zinga pathum pawh hman theih an ni tawh lo bawk.

Ni ruk chhung an indo tawha, Gaza-ah hian mitthi 1,200 chuang an awm tawh a, Israel ramah mi 1,300 chuang an thi tawh bawk. Israel mi thi zinga a tam ber chu civil mi an ni. Hamas-te'n Inrinni liam taa Israel an beih ṭum khan mi eng emaw zat chu an chenna inah luhchilhin an bei a, hmeichhe ṭhenkhat chu an pawngsual hnuah thatin, naupang pawh eng emaw zat an kap hlum tel.

US Secretary of State-in Israel a thleng

US secretary of state Antony Blinken chuan nimin zing khan Israel a thleng. US president Joe Biden chuan Israel leh Hamas-te indo mekah, US-in Israel a thlawpna lantirna atan top diplomat hi Israel ramah hian a tir a ni.

Antony Blinken hian nimin khan Israel president Isaac Herzog leh prime minister Benjamin Netanyahu te a hmu nghal. Hamas-te chu an mi hren mekte chhuah turin a phut bawk. Hamas-te'n Israel an beihnaa thi zingah khan US citizen 22 an tel a, tuna an hren mek zingah pawh America mi an tel bawk.

Vawiinah Blinken hian Palestine president Mahmoud Abbas hmuin, Jordan khawpui Amman-ah Jordan lal, King Abdullah a hmu leh bawk ang.